قلبي المشتاق متولع يباك

((قلبي المشتاق متولع يباك يا وله يا شوق قلبي والعيون))

الجزء الثالث


ما فاز قلبي فيك ما فاز خسران من كثر القطاعه
والطيف عن عيني فلا خاز سرحان في وسط الجماعه
لك في خفايا الروح برواز حبك ولا يمكن ضياعه
وعن كل متيم مول ما ياز أصبر ولا عندي استطاعه
كل ما عذرته عاند انحاز من أجل عينك اندفاعه
أسرار حبي فيك وألغاز وأخفي عن العاذل سماعه
يا من على كل الغلا حاز لا تستمع قول واشاعه
يمتاز بالخفرات يمتاز بدرٍ تعلى بارتفاعه


يوم الخميس .. 11:00
دبي
بيت أبو راشد

راشد: الموضوع يا سارة إني أحب بنت عمي شهد وأريد أخطبها بس قبل أريدج تسأليها
سارة: تحب شهد .. من متى؟؟
راشد: ليش تسألين؟؟
سارة: هاه .. ولا شي بس استغربت إنك تحبها
راشد: أحبها من زمان وكنت ناوي أخطبها بس قبل أريدج تشوفي رايها.. لأني ما أريد أسوي مشاكل بين العائلتين في حالة عدم موافقتها
سارة: يعني تريدني أكلمها في الموضوع
راشد: عيل ليش أخبرج
سارة: إنزين متى تريدني أكلمها؟؟
راشد: ما أدري شوفي إنتي الوقت المناسب بس لو يكون بسرعة أحسن
سارة: اوكيه بكلمها وبرد لك خبر.. مع إني ما أعتقد إنها توافق
راشد بعصبية: وليش ما توافق؟؟ مب تارس عينها
سارة: لا يا أخوي .. بس إحساسي يقولي جيه
راشد: المهم إنتي شوفي رأيها في الموضوع
سارة: إن شاء الله ولا يهمك
راشد: يالله تصبحين ع خير
سارة: وإنت من أهل الخير

راح راشد عن سارة وقعدت تفكر باللي يصير معقولة راشد يحب شهد.. وشهد شراح يكون موقفها لو عرفت

راشد كان في الغرفة يفكر في كلام سارة.. هو أبدا ما حط في باله إن شهد ممكن ترفضه .. لغاية ما رقد


يوم الجمعة .. 9:00
دبي
بيت أبو ناصر

ناصر في داره قبل شوي كان صاحي وكان ضاربنه الملل
ناصر وهو يكلم نفسه: يا ربي اليوم الجمعة .. وأنا قايم هالحزة وشكله الشعب راقد .. خل أروح لشهد أصحيها من النوم
راح ناصر ودق باب غرفة شهد وفتحت له الباب
شهد: ويه بسم الله الرحمن الرحيم.. شتسوي فداري؟؟
ناصر: الناس يقولوا صباح الفل والورد يا أحلى أخو فهالدنيا.. مب متخرعة كأنج إلا شايفة يني
شهد: هههههه سوري.. صباح الفل والورد والياسمين يا أجمل وأروع وأحلى أخو في الإمارات وفي العالم كله.. شتبي بعد؟؟
ناصر: ما أبي شي خلاص كفيتي ووفيتي .. زين قولي إدخل تفضل موقفتني ع الباب
شهد: إيه صح .. تفضل ليش واقف برع
إلا وتيي شوق تزاعج
شوق: أنا أريد أفهم إنت شتسوي في قسمنا هاه؟؟
ناصر: إنتي من وين طلعتي؟؟
شوق: من غرفتي بعد من وين
ناصر: وليش طالعة تزاعجين .. ايه أنا اخوج الكبير احترميني
شوق: أخوي الكبير على عيني وعلى راسي.. بس إنت صوتك مصدر إزعاج لي وأنا أريد أرقد
ناصر:وأنا ما ماسجج من هدومج ولا متعلق فيج وأصرخ شوق تكفين لا تروحين وتخليني
شهد: هههههههههه شكلكم حلو مناقر ع الصبح
شوق: شعليج إنتي صخي عني بروحي كل شياطين الدنيا فوق راسي
ناصر: بل كلهم شيسون فوق راسج .. عازمتنهم على عرس ههههههه
شوق: ما يضحك تصدق
ناصر: لا ما أصدق
شوق: إنت الحكي معك ضايع
ناصر: شرايج أنا وإنتي ندوره ههههههههههه
شوق: ناااااااااااصر مصختهاااااا
ناصر: هههههههه بس خلاص لا تعصبين
شهد: ناصر ما عليك منها.. وتصد ع شوق: هي إنتي روحي دارج
شوق: ما أبي بيلس وياكم
ناصر: روحي لاااااااه ما نريدج ويانا
شوق: ما بروووح أدري فيكم تبون تحشون فيني
شهد: لا والله مب لاقين سوالف إلا عنج
شوق: هيه مب لاقين
شهد: روحي دارج فكينا
شوق: مب رايحة .. أقول ناااااااصر
ناصر: خيرررر
شوق: إنت مب ويه حد يقولك شي .. كنت بقولج شصار أمس لشهد لما كنا في السنتر
شهد: شوقوووووووو طلعي بررررررع
شوق: ههههههههه مب طالعة
ناصر: شصاااااار؟؟
شهد: ما صار شي .. تجذب عليك هااااااااي
شوق: أناااااااا أجذب .. ما عليه .. نااااصر أمس لما كنا في السنتر الأنسة شهد ع.....
قاطعتها شهد : شوق اليوم بقول لأمي إن بنروح العين نزور أهلها هناك
شوق سكتت تذكرت الولد اللي شافته وتذكرت إنها لو تكلمت ممكن شهد تغير رأيها وما تقول لأمها فسكتت
ناصر: كملي شفيج علقتي؟؟
شوق: هاه... ولاشي بس ما بقولك إنت ما تستاهل حد يقولك
ناصر:مالت عليج يا شوقوووه ..إنزين شو تسوون في العين؟؟
شهد: بنروح نشوف أهلنا هناك
ناصر: أهااااا .. ما بتشلوني وياكم يمكن أشوف لي هناك وحده غرشوب وأخطبها
شوق تذكرت سعيد وتنهدت من خاطرها: آآآآآآآآآآآآه .. متى نروح بس؟؟
ناصر: هي إنتي شفيج؟؟
شوق: هاه .. ما فيني شي.. صج إني تولهت على العين وأهلهااا واااايد
شهد: خلاص أنا بنزل احين وبكلم أمي في السالفة
ناصر: خل ننزل كلنا
ونزلوا الثلاثة وراحوا عند أمهم إللي كانت بالصالة ويا أبوهم سلموا عليهم وحبوا راسهم وقعدوا وياهم
أبو ناصر وناصر قعدوا يسولفوا عن الشركة والشغل
أما شهد ففتحت موضوع روحة العين مع أمها
شهد: أمايه بغينا نقولج سالفة
أم ناصر: شعندجن ع الصبح؟؟
شهد: أمايه شرايج نروح العين نزور أهل يدتي الله يرحمها
أم ناصر: والله إني مقصرة فيهم .. زين يا بنتي حددوا يوم وبنروح
شهد: شرايج الخميس الياي
أم ناصر: خلاص عيل الخميس بنخلي ناصر يودينا
شهد: مشكورة أمايه .. وراحت تحبها ع راسها وشوق من وراها

تقررت السيرة لزيارة أهل أم ناصر يوم الخميس الياي وشوق كانت فرحاااانة وااااااايد لأنها حاطة أمل إنها تشوف القلب هناك..
أهل العين يقربون لأم ناصر قرابة مب بعيدة يعني يدة سعيد تصير بنت خالة يدة شوق


يوم الجمعة .. الساعة 5:00 العصر
دبي
بيت أبو مايد

كان مايد يالس في الصالة يطالع التلفزيون وأمه قاعده عداله
أم مايد: شو مايد اليوم ما بتروح الشركة
مايد: لا يمه اليوم الجمعة إجازتي المعتادة
أم مايد: هيه صح نسيت .. شكلي كبرت
مايد: حشى من يقول إنج كبرتي.. بعدج في شبابج يا أم مايد
إلا أقول يمه شرايج اليوم نروح نزور هم عمي راشد
أم مايد: إنت شرايك نعزمهم في بيتنا كلهم
مايد: فكرة حلوة أنا بتصل حق ناصر وراشد وإنتي شوفي الحريم
أم مايد: خل عيل أقوم أتصل
وراحت تتصل .. أما مايد فكان خاطره يروح يشوف الريم لكن ألحين هي اللي بتيي وراح يخبر أخته عن العزيمة
أم مايد أول شي اتصلت في أم ناصر
أم مايد: السلام عليكم
أم ناصر: وعليكم السلام
أم مايد: هلا بأم ناصر.. شحالج وشحال العيال؟؟
أم ناصر: بخير يعلج الخير شحالج إنتي؟؟
أم مايد: بخير الحمد لله .. أقول أم ناصر
أم ناصر: هلا
أم مايد: اليوم بعد صلاة المغرب عازمينجم عدنا.. خلينا يابوج نجتمع بما إن اليوم الجمعة وباجر تدرين مدارس وكليات
أم ناصر: هيه والله .. زين عيل بخبر البنات أنا وبعد صلاة المغرب إن شاء الله بنكون عندكم
أم مايد: خلاص عيل أشوفج بعدين .. سلمي ع البنات
أم ناصر: يبلغ بإذن الله.. مع السلامة
أم مايد: مع السلامة

بعد ما خلصت من أم ناصر إتصلت في أم راشد وعزمتها والثانية قالت بتيي بعد المغرب إن شاء الله .. وبعدها راحت للبشكارة تخبرها وتعلمها شو تسوي

أما مايد إتصل حال أولاد عمومته طبعا أبو ناصر مشغول وما بيي وأبو راشد مسافر .. بس ناصر قال بيي وراشد ومحمد بعد
بعد ما خلص راح دار فواغي اللي كانت تكلم الريم ع الماسنجر ودق الباب
فواغي: تفضل
مايد: هلا فواغي شحالج؟؟
فواغي بدون لا تشوفه لأنها كانت مشغولة: بخير وسهالة .. شحالك ؟؟
مايد: بخير.. شتسوين؟؟
فواغي: قاعدة أكلم الريم ع الماسنجر.. بغيت شي؟؟
من سمع الريم صخ .. وجان خاطره يشوف شنو إيميلها بس ما قدر فياته خطه عبقريه
مايد: فواغي أمي جأنها تناديج .. روحي شوفيها شتبي؟؟
فواغي: لحظة شوي بقول للريم إني بييها بعد شوي

غيرك بقلبي ما سكن شخص ثاني: أقول ريمووو أمي تناديني .. إنتظري علي شوي

اللي مثلي لو تدلع الدلع لايق عليه واللي مثلك لو تولع اللي مثلي وش عليه: أوكيه بس لا تتأخري

راحت فواغي تشوف أمها .. ومايد استغل الفرصة وراح يشوف إيميل الريم .. نقله بسرعة قبل لا تيي أخته وطلع

فواغي: أمايه .. وينج؟؟
أم مايد: هلا فواغي .. أنا هنيه .. بغيتي شي؟؟
فواغي: لا بس مايد يقول تبيني
أم مايد: لا ما أباااااااج .. بس أقولج ترا نحن اليوم عازمين عمومتج ع العشا.. بعد المغرب إن شاء الله
فواغي: والله .. صج وناااااسة.. خل أروح أخبر ريموووو

وراحت فواغي دارها واستغربت إن مايد مب موجود في دارها

غيرك بقلبي ما سكن شخص ثاني: هلا

اللي مثلي لو تدلع الدلع لايق عليه واللي مثلك لو تولع اللي مثلي وش عليه: لو ما ييتي جااان زين

غيرك بقلبي ما سكن شخص ثاني: هههههه لا بس أمي جانت تقولي شي

اللي مثلي لو تدلع الدلع لايق عليه واللي مثلك لو تولع اللي مثلي وش عليه: شنو؟؟

غيرك بقلبي ما سكن شخص ثاني: بدا الفضول يشتغل ههههههه

اللي مثلي لو تدلع الدلع لايق عليه واللي مثلك لو تولع اللي مثلي وش عليه: يالله عاد قولي لا تصيري كريهه

غيرك بقلبي ما سكن شخص ثاني: بقول وأمري لله .. أمي اليوم عزمت أمج وأم راشد عدنا في البيت بعد صلاة المغرب ع العشا


اللي مثلي لو تدلع الدلع لايق عليه واللي مثلك لو تولع اللي مثلي وش عليه: والله .. جااااااااان استانس ههههههه

غيرك بقلبي ما سكن شخص ثاني: حتى انا استانست وااايد

اللي مثلي لو تدلع الدلع لايق عليه واللي مثلك لو تولع اللي مثلي وش عليه: عيل أقول خليني أظهر بعدين بشوفج

غيرك بقلبي ما سكن شخص ثاني: اوكيه يالله مع السلامه

اللي مثلي لو تدلع الدلع لايق عليه واللي مثلك لو تولع اللي مثلي وش عليه: مع السلامة

وسكرت الريم عن فواغي .. أما فواغي فراحت لمايد في داره.. مايد كان قاعد ع الشبرية ويناظر إيميل الريم إلا ودق ع الباب
فواغي: ممكن أدش
مايد وهو يخبى الورقة اللي فيها الإيميل: تفضلي فواغي
فواغي: ليش طلعت من دراي قبل لا أيي؟؟
مايد: هاه .. لا بس تذكرت شغله مهمه لازم أسويها
فواغي: اهااا
مايد: قالت لج أمي عن العزيمة بعد صلاة المغرب
فواغي: هيه قالت لي
مايد: أقول فواغي
فواغي: هلا
مايد: ما عرفتي بنات عمي شو أسماءهن في المنتدى؟؟
فواغي: لا وما سألتهن.. ليش؟؟
مايد: فواغي إذا طلبت منج خدمة تسوينها
فواغي: شتبي قول.. اليوم ما يايين نخلص
مايد: أريدج تعرفين لي الريم شنو أسمها في المنتدى؟؟
فواغي: ليش؟؟
مايد: أريد أعرف لغاية في نفسي وإذا عرفتي من إسمها ساعتها راح أخبرج ليش.. بس ألحين ما بقول شي
فواغي:بسأل وبعرف بس بشرط؟؟
مايد: يالمذلة .. قولي شتبي؟؟
فواغي: تطلعني أتعشى ع حسابك الخميس الياي
مايد بتفكير .. ماحد غير فواغي يقدر يساعدني .. فخل أوافق وإلا ما راح أعرف شي
فواغي: شقلت؟؟
مايد: شبقول.. مواااافق وأمري لله
فواغي في خاطرها .. ياعيني يالريم صايرة محط اهتمام أخوي ومن وراج بضرب عشوة برع البيت
مايد: فشنو تفكرين؟؟
فواغي: ولا شي .. أنا بروح أرتب داري وأجهز عمري قبل لا يأذن المغرب وأيوون
طلعت فواغي عن مايد وهو راح للإيميل وبسرعة دخل الماسنجر عسب يضيفها قبل لا تضيع الورقة عنه
وانتظر الموافقة ع الإضافة تييه